Бұл туралы Caravan.kz медиа портал Sputnik.kz-ке сілтеме жасап хабарлайды.

Air Astana және PetroChina International Kazakhstan стратегиялық әріптестік туралы меморандумға қол қойды, деп хабарлайды әуе компаниясының баспасөз қызметі.

"Меморандум шеңберінде компаниялар әуекеросинді жеткізу мәселелері бойынша ынтымақтасуға, инфрақұрылымды құру және халықаралық стандартына сәйкес Jet А-1 авиациялық отынға көшу жөніндегі жұмысты жүргізуге келісті", — делінген хабарламада.

Қазақстанда отынның осы түрі өндірілмейтіндіктен компаниялар сондай-ақ Jet А-1 және экологиялық таза авиациялық отынды (SAF) Қытайдың мұнай өңдеу зауыттарынан тікелей импорттау мәселесін талқылады.

Компания президенті Питер Фостердің айтуынша, Air Astana маршруттық желіні белсенді түрде кеңейтіп, әуе паркін жаңа ұшақтармен көбейтпек.

Отынмен қамтамасыз ету мәселелерінде серіктестеріміздің қолдауы Air Astana-ның одан әрі өсіп дамуына септігін тигізеді. ESG стратегиямызға сәйкес авиацияда инновациялық және экологиялық бастамаларды енгізуге ниеттіміз", — деп мәлімдеді ол.

Jet A-1 — IATA (Халықаралық әуе көлігі қауымдастығы) стандарттарына сәйкес отын түрі. Jet A-1 әлемдік бренді Қазақстанда қолданылатын ТС-1/РТ маркаларынан өндіріс пен сақтау технологиясы арқылы ерекшеленеді.